Jean Stassen, inne hoeëfdrol as Filips van Horne in “Graaf van Horne De Musical”, és 49 jaor en woeëntj in Ospel. Vanaaf 2009 zênger beej Limbo Project woeë hae Limburgstalige popmuziek maaktj.
Dieëze meziek bestieët uut eîge wêrk en Nederlandstalige popmeziek vertaaldj in dialect.
As froontmân beej de coverband Watts in a Name és de meziekloupbaan van Jean begonne.
Dieëze band hieët dik 20 jaor opgetroeëje en mét völ plezeer meziek gemaaktj.
Inne aafgeloupe jaore hieët hae aan verschillendje schoeën projecte mejgedaon. Mét de band Double Axe ‘ne set van Southside Johnny op ’t podium gezatte en in ’t kader van vastelaovendj ’n aantal jaor as froontmân beej de fieëstband Bacchus gezoonge.
De léste jaore hieët Jean oonger ângere mét hêrmeni-j- en Big-Band orkeste gewêrktj en moge zînge in theatershows in ’t Munttheater as “Belaeftj Kefee Veldeke’ en de show in ’t kader van ’t viêfjaorig bestaon van ’t Toon Hermanshuis in Wieërt.

Linda Smeets, as Marieke Caris in de hoeëfdrol van “Graaf van Horne De Musical”.
Zângeres, singer-songwriter, zangdocente.
In 2006 studieërdje ze aaf een ’t Conservatorium van Utrecht vör Lichte Muziek/Zang.
Gae kuntj eur kinne o.a. van: Radio 3 beej Rob Stenders en Gerard Ekdom, Radio 2 beej Daniel Dekker, L1, Rowwen Hèze (‘Saus’, De vrienden van Amstel live), She Got Game 3 en XL (Leoni Jansen) en TVOH 3 (Team Borsato).
Linda troeëj al op in groeëte zale zoeë as Ahoy, Carré, De Heiniken Music Hal, ‘t Concertgebouw van Amsterdam, De Kleine Komedie en mieër. Ze schrieftj eur eîge nummers inne stiêl van KT Tunstall, Sheryl Crow, Aimee Mann, Carol King en James Bay.
Naeve ’t groeët aantal optreî-jes di-j ze same mét eure gitarist PartyBoest en in verschillendje projecte guftj, deut ze ouch studiowêrk en és eigenaar van de succsesvôl zangschoeël “Zang en Co” di-j ze in Den Haag en Wieërt opgezatte hieët.
Kiektj vör mieër informasie op www.lindasmeets.nl en www.zangenco.nl

Michiel van Horen, as Michiel in ‘n hoeëfdrol van “Graaf van Horne De Musical”.
Na jaore boete Wieërt gewoeëndj te hebbe és hae weer trök in Wieërt. Zien ieërste muzikaal ervaringe dieëj hae op beej van Horne Pop (wi-j towpasselik), ’t jaorlikse muziekfestijn oppe middelbare schoeël Philips van Horne in Wieërt.
Daonao ging Michiel nao de Rockacademie in Tilburg woeë hae as ieërste lichting aafstudieërdje op zang en geluidstechniek. Aansloêtendj hieët hae jaore beej de radio in Hilversum gewêrktj, mer zitj noow beej Multimedia in Eindhoven.
Michiel hieët in völ bands gezoonge o.a. No Avail en Go to the Max mét e repertoire vari-ieërendj van rock wis pop. Musicalervaring, net as ’t Wieërter dialect hieët hae nog neet hieëlemaol oonger de kni-j, dus dieës now rol és vör hem ’n groeëte, mer ouch ’n welkome uutdaging.
PROFESSIONAL MEDIA CREATOR

Sanne Heuyerjans, in ’n hoeëfdrol as Hafida in “Graaf van Horne De Musical” op 11 en 12 mei 2018. Det és vör eur ‘n groeëte ieër. ‘t Weurtj eur ieërste rol oeëts in ‘ne musical, dus ‘n enorm uutdaging.
Hieël joonk begonne mét zînge, vanaaf eur 7e in verschillendje koeëre en bands. Op 12-jaorige laeftiêd hieët Sanne eure ieërste band opgerichtj en later de band Shiverburn as leadzangeres en tekstschriêfster.
Ouch hieët ze al op hieël völ groeëte evenemênte gespuuëldj, woeë oonger ‘t Bevrijdingsfestival in Remundj, vuuërprogramma 3 Doors Down en zelfs ‘nen hieële Europatour gemaaktj. Inne finale van “Nu of nooit” stong ze mét eure band bekans op Pinkpop.
‘ne Musical és now vör Sanne mer det maaktj zjuust det ze d’r des te mieër nao uutkiektj. Ze és hieëlemaol klaor vör dieës now uutdaging.
Lekker zînge maaktj Sanne echt hieël gelökkig.

Leon Smolenaers, as Willem van Oranje in de “Graaf van Horne De Musical”.
Hae és zien muzikaal carrière begonne thoês inne badkamer van zien aojers as solist.
Vanaf zien zieëvendje tot zien elfdje jaor gezoonge beej de kêrkelike De Rikrakkers in Ospel.
Wi-j hae 16 jaor woor, in ’t examejaor, hieët hae de hoeëfdrol as Billy Jones gespuuëldj in de indj-examemusical vanne Philips van Horne “De sterren”.
Daonao vanaaf zien 15e jaor wis noow leadzênger van de band “Guarantee”. In 2014 hieët hae mét groeët succes de hoeëfdrol gespuuëldj van Jan in de zieër geslaagdje “Rogstaekers de Legende” , vuuërluiper van “Graaf van Horne De Musical” in 2018.
In ’t dagelikse laeve veultj hae meinigeîn aanne “tând”.

Fämke Gerits in de rol van Walburgis van Nieuwenaer in “Graaf van Horne De Musical”.
Ze zingtj al zoeëlang as ze zich kân herinnere. Vreuger oonger ângere beej de Streetsingers op Laor. Het hieët ouch same mét ânger in de vocalgroep FAB 5 gezaete. Mét dieëze vocalgroep ‘n aantal jaore  gezoonge beej de bekindje Copperband Moorland uut de Hej.  Musicalervaring hieët ze al doeërdet ze inne Rogstaekersoperette in 2000, as jonge Anna spuuëldje.
In 2004 hieëget mejgedaon inne musical “Herrefst”. Al jaore stieët Fämke mét hâlfvaste oppe buun mét Manoeuvre beej ‘t Tapzînge. Op dit memênt zînget in de MLC band uut Ni-jwieërt-Indj.

Ronald en Carien Moonen in de rol van zênger fieëstnummer.
45 jaor gelieëje és zien muzikaal carrière begonne mét ‘ôrgelspuuële’, daonao hieël völ schoeëlinge gehadj in oonger ângere piano, zang en studiotechniek. Bekans 20 jaor as freelancer gewêrktj vör Johnny Hoes in Wieërt.
Ronald hieët in völ orkeste gespuuëldj mer noow al 26 jaor as de ein helft van duo Difference.
Sinds 22 jaor beroepsmaotig bieëzig mét meziek in eîge studio en op ’t podium. Ervaring és geîn probleem. In “Rogstaekers de Legende” dieëj hae mét völ plezeer de rol van börgemeîster.

Joss Mennen, in de rol van Alva in “Graaf van Horne De Musical”.
Nao ’t groeëte succes van de musical “Rogstaekers de Legende” beej de veering van 600 jaor stad Wieërt in 2014 és hae hieël bli-j dette weer dael uutmaaktj vanne artieste en produksiegroep van “Graaf van Horne De Musical”.
Naeve de rol van Alfa és Joss ouch, net as beej “Rogstaekers de Legende”, verantwoeërdelik vör de meziek. In dieës uutdaging kan hae zieëker z’n ei kwiêt in ’t brînge van ‘n middelieëuwse sfeer in bekindje lidjes van dieëzen tiêd.

Mark Fonteijn, in de rol van vader van Hafida in “Graaf van Horne De Musical”.
Van kleins aaf aan és Mark en later same mét ziene partner Wilhelmien muzikaal actief. Ze zeen bekindj oonger de artiestenaam “Mark & Wilhelmien” of ouch waal “Duo Double You M…”. Meziek make és vör eur ‘n groeëte hobby. ‘t Hieël jaor doeër traeje ze op beej völ fieëstjes. Van broelofte wis personieëlsfieeste, of waat d’r ouch te vere és! Ouch eure twieëling Lieke en Stef hebbe ze al besmetj mét ‘t muzikale virus. Naeve ‘t meziek make zeen Mark en Wilhelmien vastelaovendjveerders in hert en nere. En as dejje dieës twieë dînger dan ouch nog kuntj kombinieëre dan és det kejsjiek.
Ze hebbe al ’n aantal kieëre inne halve finale van ’t LVK gestânge en daonaeve zeen ze ouch al verschillendje kieëre winnaar gewaesj vanne vastelaovendjschlager van Stadsvastelaovendjvereîniging De Rogstaekers uut Wieërt. Kiektj gerösj ’s op eur website. www.duowm.nl

Björn Wiermans, in de rol van Troubadour in “Graaf van Horne De Musical”.
Zoeëwiêt asse zich kan huuëge és meziek make zien dagelikse bieëzigheid. Net zoeë as zie vader en groeëtvader, és hae lid vanne hermeni-j St. Joseph Weert-Zuid as trompettist en vanaf 2016 bestuurslid. Tiêdes ziene middelbare schoeëltiêd oppe Philips van Horne és Björn begonne mét ’t oprichte van ziene eîge swingband ‘The Oaken Towels’. Naeve frontmân van dieëze band és hae trompetspuuële gaon kombinieëre mét zang. Same mét ‘The Oaken Towels’ mer ouch solo hieët hae mega gave optreî-jes gehadj in zoeëwaal Wieërt en umstreke as ouch inne rest van ’t lând.
Sinds kort spuuëltj Björn, naeve ziene swingband, ouch inne Wieërter fieëstband ‘De Bènt’.
As dirigênt en leider és hae verboonge aan ’t opleidingsorkest van fanfare Poort van Brabant uut Maaris. Al mét âl belaeftj Björn ontzettendj völ plezeer aan ’t muzisieëre en weît dit geveul ouch oeëver te brînge op zien medemuzikânte mer ouch zieëker op ’t publiek.

Cees Metz in de rol van voormân vanne Geuzen in “Graaf van Horne De Musical”.
Hae hieët acht jaor gefigurieërdj in producties van de Nederlandse Opera in Amsterdam.
Daonaeve zés jaar zangles genoeëte en twelf jaor in ’n Amsterdams kêrkkoeër gezoonge.
Cees és lid van mannekoeër Manoeuvre en spuuëltj ouch nog mét völ plezeer bariton.
Musicalervaring hieët hae opgedaon doeërdet Cees mejgespuuëldj en gezoonge hieët in de musical “Wieërt 601”.

Marcel Moonen in de rol van voormân vanne Geuzen in “Graaf van Horne De Musical”.
Vanaaf 1998 lid van mannekoeër Manoeuvre mét jaorliks ’t Tapzînge en de léste jaore ouch ’t Stadzînge. Mieër optreî-jes per jaor mét Manoeuvre op koeërmiddige/-aovendje en in 1999 mét dit koeër (toen nog ’t Jongemannekoeër) ’t Rogstaekers Lidjesfestival gewonne mét ’t lidje “Alaaf” en heejmej inne finale van ’t LVK gestânge.
In 1999 cd-opname mét Manoeuvre, in 2000 mejgespuuëldj inne Rogstaekersoperette en in 2004 gespuuëldj in de musical “Herrefst”. Daonaeve mejgedaon in verschillendje Promsconcerte.
In 2007 heeft Marcel mét Manoeuvre in ’t Munttheater de aovendjvöllendje show “Men & Wheels” uutgeveurdj en daomej zeen ze de ieërste winnaar gewoeëre van de Wieërter Podium Publiekspriês.
Ouch hieët hae mét Manoeuvre mét völ plezeer en enthouasme ‘n beedrage geleverdj aan de Boonte Aovendje van vastelaovendjvereîniging de Rogstaekers.
In de noow al legendarische “Rogstaekers de Legende” in 2014 hieëtte de rol van ‘daeke’ moge spuuële. Vanaaf 2015 jaorliks mejgezoonge in ’t gelaegenheidskuuërke vanne vastelaovendjmés en in ’tzelfdje jaor ’n hoeëfdrol in de musical “Wieërt 601” gespuuëldj.

Frans Snels in de rol van Spaanse soldaot in “Graaf van Horne De Musical”.
Zoeë as beej edereîn bekindj zal zeen és Frans leadzênger, 2e stum, geluidemaker en daonaeve ’t achtergroondkoeër van ’t duo Ed & Frans. Hilarisch duo same mét Ed Stroek inne Rogstaekers Boonte Aovendje en bekindj vanne Herrensitzung in Wieërt.
Daonaeve völ optreî-jes in Limburg tiêdes de vastelaovendjdaag. Neet vrieëmdj det Frans dan ouch de rol gieët invölle van soldaot in de Musical.

Milo Seerden in de rol van non Maria Luyten in “Graaf van Horne De Musical”.
Al vreug begosj mét meziek en op achtjaorige laeftiêd beej ’t jeugdkoeër van Groenewoud gegânge.
Inne brögklas vanne Philips van Horneschoeël in Wieërt, hieëget as extra vak VOCO gedaon (vuuëropleiding conservatorium). Inne middelbare schoeëltiêd hieët Milo mét völ muzikaal activiteite van schoeël mejgedaon en ’t waas dan ouch neet echt ’n verrassing det ze nao ’t behale van ’t middelbare schoeëldiploma wieter woeëj inne meziek.
Zoeë és Milo op ’t Arcus College terecht gekaome en hieët de opleiding Artiest Popmuziek gevolgdj
woeënao ze nao 3 jaor eur studie mét succes hieët aafgerondj mét ’n diploma.
Op dit memênt studieërtj ze Vocals aanne Rockacademie in Tilburg.

Mark Op ’t Roodt in de rol van Spaanse soldaot in “Graaf van Horne De Musical”.
De zangcarrière van Marc és begosj in 1994 in ’t zangkoeër van Rita Scheffers beej paroche de Goede Herder in Groenwoud. Heej és de muzikale boeëm gelagdj vör ziene latere doeërbraak inne Wieërter etablissemênte. As 'singer-songwriter' vöral op Laor werreldjberoemdj gewoeëre mét oonger ângere de hit ‘Dor in Dor uut Dor op Dor af!’, ‘Das ist ganz nichts’ en "Vae gaon nao Bieële vanne Tram". Dit nummer weurtj nog eder waekindj gedrejdj in ’t geliêknamige kefee aanne Emmasîngel. En de nowe hit met de Broeds brothers "Ween kan mich vertellen waat ich gester heb gedaon"
Daonaeve ouch al 7 jaor actief as artiest vanne Rogstaekers Boonte Aovendje. Same mét Frans & Ed keumtj Marc hieëlemaol uut Spanje um de Wieërtenare gerösj te stélle.

Rick Weegels in de rol van Willem in “Graaf van Horne De Musical”.
Hieët ouch, net zoeë as völ ânger ervaring opgedaon as spuuëler in de musical “Rogstaekers de Legende”. Ouch hieët Rick gezoonge oppe Rogstaekers Boonte Aovendje.
Op dit memênt zingtj hae beej mannekoeër Manoeuvre en daonaeve beej duo Two for You

Ton Wolter in de rol van herbergier van Stralen in “Graaf van Horne De Musical”.
Al ruum 15 jaor zênger van beroep in alle genres. Ton begos 35 jaor gelieëje mét zînge op broêlofte en perti-jje. ‘ne Völ gevraogdje artiest mét zijn Duitse alter-ego Thorsten von Lippe Biesterfeld. Hae stong al op völ podia, zoeë as Ahoy, Dutch Valley, Paaspop, Zwarte Cross, Effenaar en in völ theaters in Nederland. Tegewoeërdig treutj hae op as look-a-like van de onlangs gestôrve Eddy Wally, dit mét goodkuuëring van Eddy’s dochter Marina.
In “Rogstaekers de Legende” spuuëldje Ton de rol van vésboor en és noow te zeen in “Graaf van Horne De Musical” as barmân.

Wendy van Dooren in de rol van Anna van Egmont in “Graaf van Horne De Musical”.
Nao nuuëge jaor te hebbe gezoonge in pop/rockband Lettuce és ze solo gaon zînge beej diverse muzikaal gelegenhede. Ouch hieët Wendy opgetroeëje in diverse combo’s beej theatershow’s, musicals, enz. Daonaeve schriêvet zien eîge lidjes. Nao ’t winne van ’n talêntejacht in 2013 hieët Wndy twieë eîge ldjes professionieël moge opneme en uutbrînge mét as uutkomst eure ieërste eîge cd-single ‘Still on my mind’. Dae single hieët mer leefst 22 waeke Inne Top 40 van Wieërt FM gestânge en és ouch gedrejdj op L1 Radio.
Beej ’t bezeuk vanne kuuëninklike femiêlie aan Wieërt in 2011 haaj het e live-optraeje beej Radio 2.
In 2014 hieët Wendy ein vanne hoeëfdrolle gehadj inne “Rogstaekerslegende en e jaor later in “Wieërt 601”. Zieëker e mizikaal hoeëgtepûnt waas eure eîge aovenjdvöllendje theatershow in 2015 op ’t podium van ’t Munttheater. Mét VIDO hieëget opgetroeëje op Bospop in 2016. Op ’t ougenblik zînget regelmaotig mét ’n zéskoppige band in verschilllendje settinge, zoeë as beej ’t festival ‘Share e perfect day’ in 2017.

Esther Snijders in de rol van moeder van Michiel in “Graaf van Horne De Musical”.
Ze komt uit Stramproy en is al vanaf haar kinderjaren bezig met muziek. Ook is ze al heel vroeg begonnen met pianospelen en zingen. Op haar 12e jaar deed ze voor het eerst mee aan de Boonte Aovendj in Stramproy. Vervolgens heeft ze heel wat jaren vastelaovendjlidjes gezongen.
Daarnaast heeft ze in diverse coverbands gezongen en samen met Limbo Project Limburgstalige muziek gemaakt. Ook heeft ze in het Munttheater op het podium gestaan bij de theatershow “Belaeftj kefee Veldeke” en de Toon Hermans muziekuitvoering. Het maken van muziek heeft een aantal jaren op een laag pitje gestaan, maar het bloed kruipt waar het niet gaan kan en vanaf vorig jaar heeft ze het zingen weer opgepakt wat weer voelt als vanouds, heerlijk! Esther vindt het een grote eer om mee te mogen werken aan “Graaf van Horne de Musical” en heeft er heel veel zin in!

Evelien Truyen in de rol van Bieëldjestôrmer in “Graaf van Horne De Musical”.
Zang, theater en dâns zeen dînger woeë ze dageliks mej bezig és. Sinds ’n aantal jaore és ze aafgestudieërdj aan ’n theateropleiding woeëncao ze in völ tenieëlstökke en op verschillendje plaatse in Nederland hieët moge spuuële. Allewiel woeëntj het in Eindhoven en wêrktj as dânslieërares en dânseres. Zoeë waas het te zeen as achtergroonddânseres beej ’t tv-programma ‘Holland’s Got Talent’ en dânsj het waekeliks beej verschillendje dj’s op festivals.
Ouch as zangeres és Evelien nog actief. Mét de jazzband One Word bracht ze dit jaor ’n album uut det ze hebbe opgenoeëme in New York. Daonaeve treutj ze dékker op same mét eure vreendj as Eva & David. Zanglés krieëg ze van de zanglieërares van o.a. Anouk en Eva Simons. Op ’t ougenblik studieërtj ze logopedie en wêrktj op verschillendje plaatse as zangcoach. Mejzînge, dânse en en spuuële in “Rogsteakers De Legende” vong ze fantastisch enn ouch vör de musical “Graaf van Horne” keumtj ze gaer trök nao Wieërt.

Ruud Theunissen in de rol van Lamoraal van Egmont in “Graaf van Horne De Musical”.
Hae és lid gewaesj van Manoeuvre, de Streetsingers, de Vastelaovundjzêngers, de Copperband Moorland, en hieët mejgedaon aan de “Rogstaekersoperette” en de musicals “Herrefst” en “Wieert 601”. Hae és ongerdael gewaesj van de ‘drej Wieërter tenore’ en ‘t duo Gerlinde en Ruud.
‘n Aantal kieere hieëtte mej moge doon aan de mantelzorgconcerte van Hermeni j St.Joseph Wieërt- zuid. En noow nog actief beej fieëstband Dial 24.

Ton Smeets in de rol van Beul in “Graaf van Horne De Musical”.
Zien muzikaal carrière és begonne wi-j hae e jaor of 17 woor in Tungelder oppe Tuurkeswieëg same mét Peter Paul Meusen, Marcel Hoeben en Raymond Smolenaers inne band Spinkx.
Nao dit avontuur és hae gevraogdj um beej de band Fun te kaome zînge en bas spuuële. Dit hieët hae 15 jaor mét völ plezeer gedaon. In di-j periode hieët Ton ouch nog, same mét lede van Fun dael uut moge make van Plat Wiëerts, waat ‘ne geweldjig schoeëne tiêd woor.
Daonao hieët hae same mét e stél geweldjige aojhore schoeën jaore moge belaeve in de band TSJEH TSJEH TSJEH. Ton hieët twiëe kiëer inne theatershow van Joss Mennen gespuuëldj, eîne kiëer as gastzênger en d’n ângere kiëer in ‘t achtergroondkoeër.
Wieter hieëtte vör Veldeke Wieërt en later vör ‘t Toon Hermans Huis ‘n schoeën theatershow mej moge make in ‘t Munttheater. Op dit memênt spuuëltje in ziene eîge band Second Youth.

Ed Stroek in de rol van Spaanse soldaot in “Graaf van Horne De Musical”.
Vörâl bekindj as artiest vanne boonte aovendje van vastelaovendjvereîniging De Rogstaekers.
Van 1999 wis 2013 waas hae actief as schriêver, artiest en zênger. Daonaeve treutj Ed regelmaotig op as fieëst/carnavalschlagerzênger mét ziene onaafscheidelike maot Frans Snels. Ouch hieët hae regelmaotig mejgedaon aan ’t Rogstaekers vastelaovendj Lidjesfestival, mét as hooëgtepûnt ’t winnendje lidje “Lewi-j”in 2007. In ’t zelfdje jaor waas Ed ouch nog Stadspreens van Wieërt.
Op dit memênt spuuëltj Ed in ’t suksesvolle theatergezelschap “Weerse Prei”.
Persuuënlik vingtje ein van zien schoeënste ervaringe zien daelname aan de “Rogstaekerslegende” in 2014, woeë hae in ’n klein rol ontzettendj genoeëte hieët van dit spektakel mét oeëverweldjigendje impact en reaksies op dieëze musical.

Stefan Wolter, as Sjors in “Graaf van Horne De Musical”.
Muzikaal gezeen és hae begonne oppe basisschoeël, woeë dette vör het ieërst mocht vuuërzînge vanne meîster. Oppe middelbaar schoeël echt gepreufdj aanne bühn. Doeër de jaore haer ‘n aantal musicals/optraejes gehadj en daonao noeëts mieër vanne bühn weggegânge! Al jaore zênger in ‘t duo ‘R3wind Acoustic’ en sinds kort ouch ongerdael van ‘De Zingende Barmannen’ en ânger konsepte van Podium23. Doeëre waek geuftj hae Îngelse lés op ‘t MBO, van woeë uut hae in mieërt 2018 same mét studênte ‘n groeëte productie inne Maaspoort in Venlo nieër zal zétte.
‘t És vör Stefan d’n ieërste kieër dette mejdeut aan ‘n groeëte Wieërter vuuërstélling en dao hieët hae onnoemelik völ zin in!







Meer info / contact: