Dorus van den Bosch, regisseur en same met zien broor Peter ouch de productie van “Graaf van Horne De Musical”.
Hae hieët jaore de regie en productieleiding vanne Boonte Aovendje vanne Rogstaekers gedaon.
Regie vanne Herrensitzungen vanne Rogstaekers. Daonaeve regie van verschillendje theaterproducties, woeë oonger de shows van Joss Mennen, Veldeke en van Ed & Frans.
Regie van verschillendje ongerdaele van Rog TV.
Ouch regie en productie vanne musical “Rogstaekers, de Legende” in 2014.
En lid van theatergroep De Weerse Prei.

Ton Adriaens, vertéller en regisseur van “Graaf van Horne De Musical”.
Sommige minse hebbe technische aanlég en zeen ontzéttendj hendjig. Ton neet! Taal en communicatie és mieër zien dînk. Hae hieët lidjes geschrieëve en gezoonge, verhaole, gedichte, sketches, conferences en columns geschrieëve, op tenieël en vuuër de camera gestânge. Hae waas presentator, veilingmeîster, interviewer, gastspraeker en ‘ambtenaar’ burgerlike stând. Ouch hieët Ton lésse dramatische expressie en workshops improvisatie en theatersport gegaeve. Mer ‘t spectaculaerste woeë hae aan hieët moge mejwêrke vingtj hae “Rogstaekers, De Legende”!
En noow stieet d’r wieër zoeë’n groeëte creatief uutdaging vör de duuër. Hae hieët d’r hieël völ zin in!

Peter van den Bosch, same met zien broor Dorus de productie van “Graaf van Horne De Musical”.
In ’t dageliks laeve stieët hae mét völ plezeer vör de klas oppe Koala schoeël vör nowkaomers oppe aoj kezêrne in Wieërt.
Same mét ze broor Dorus 4 jaor lânk de uutzendinge van Rog Tillevies verzörgdj. Dit woeërt oppe aovendj vanne uutroping vanne Stadspreens uutgezonde via WTV.
In 2014 ouch weer same mét ze broor verantwoeërdelik vör de productie van “Rogstaekers De Legende”. ’n Onvergaetelik spektakel woeë hae dan ouch hieël gruuëts op és.
In 2016 hebbe Dorus, Ton Adriaens, Mark Bouwmans en Peter op verzeuk van Veldeke Wieërt in ’n aafgelaâje vôl Munttheater ’n aovendvöllendj programma geproducieërdj mét as titel “Kefee Veldeke”.
Mét dieëze zelfdje groep brînge ze in 2018 “Graaf van Horne De Musical”.
Ouch vör dieës productie hale ze weer alles uut de kast um de minse van Wieërt en verre umstreke twieë  onvergaetelike aovendje te bezörge!

Mark Bouwmans bestuurslid Wieërt Ammezieërtj en tekstschrijver Graaf van Horne De Musical.
Al mieër as 25 jaor aktief as mede organizator van groeëtschalige evenemênte in Wieërt. ’t Begos allemaol met ’t regionaal bekindje Wiepkesbâl, mér ouch beej ‘t 7x11 en 8x11 jubileum van de Rogstaekers en de Gulden Humor van 1996 en 2010 woor Mark as organisator en bedînker van de opzet vör dit evenemênt betrokke. Ouch beej de theatershow van Veldeke en ’t Toon Hermans Huis in 2016  spuuëldje Mark ’n artistieke rol binne de organizâsie. Beej de musical “Rogstaekers-De Legende” woor Mark, net as now beej “Graaf van Horne-de Musical”, artistiek indjverantwoeërdelik. Naeve de organizatorische invölling és Mark dék ouch betrokke beej ’t artistieke proces. Ouch bij “Graaf van Horne-De Musical” teikentj Mark weer vör alle lidjes tekste en és hae mede bedînker van ’t verhaol.

Joss Mennen, productieteam opname en arrangeur muziek van “Graaf van Horne de Musical”.
Rock Inc. Entertainment (www.rockinc.nl) zal, net as beej “Rogstaekers – De Legende”, zörgdrage det alle 27 bekindje popnummers tiêdes de uutveuring van de nowwe musical te heure zeen.
De nummers zulle doeër Joss Mennen gearrangieërdj en opgenoeëme waere op ‘n meneer det ze hieël good passe beej de hedendaagse en middelieëwse sfeer van de vuuërstélling.

Ferry Nijsen, film- en videoregistratie van “Graaf van Horne De Musical”.
Eigenaar van S-E-P, Special Events Productions.
Mét zien bedriêf verzörgtj hae oonger ângere live videoregistraties beej evenemênte en popconcerte, zoeë as Bospop, Moulin Blues en Wieërt A-laaif.  Al hieël völ jaor wêrktj hae same mét meziekcentrum de Bosuil woeë Ferry zoeëwaal vör binne- as boetelandse artieste videoregistraties verzörgtj. Vör stichting Sint Nicolaas Wieërt maaktj hae al jaore de traditionieële Sinterklaosfilm.
Same mét Peter en Dorus van den Bosch hieët hae 4 jaor lang Rog Tillevies verzörgdj. In 2014 hieët Ferry ouch weer same mét Peter en Dorus alle achtergroondbieëldje van “Rogstaekers – De Legende” geproducieërdj net as de promo’s, dvd en videoclip van di-j productie.
En in 2016 hieëtte de videobieëldje vanne theatervuuërstélling “Kefee Veldeke” in ’t Munttheater gemaaktj.
Ouch vör “Graaf van Horne De Musical” kaome alle bewegendje bieëldje tiêdes de opveuring en de diverse promo’s van zien hând.







Meer info / contact: